Përfaqësuesja e lartë e Bashkimit Evropian, Federica Mogherini ka bërë bashkë sonte në Bruksel presidentin kosovar, Hashim Thaçin dhe atë serb, Aleksandar Vuçiqin.

Zëdhënësja e Mogherinit, Maja Kocijançiq përmes një postimi në Twitter ka bërë të ditur se takimi i përbashkët që ndryshe është cilësuar si darkë pune është duke vazhduar.

Para takimit të përbashkët, Mogherini ka takuar ndaras, fillimisht presidentin serb, Aleksandar Vuçiq dhe më pas edhe atë kosovar, Hashim Thaçi.

Takimi ndërmjet dy presidentëve ka si synim avancimin përpara të dialogut midis të dyja vendeve për relaksimin e raporteve reciproke, njofton Klan Kosova.

??#EU facilitated #dialogue: HRVP @FedericaMog meets with @predsednikrs @avucic ahead of joint meeting w @HashimThaciRKS pic.twitter.com/FPSgsu3qxR

— Maja Kocijančič (@MajaEUspox) March 23, 2018

??#EU facilitated #dialogue: HRVP @FedericaMog meets with @HashimThaciRKS ahead of joint meeting w @predsednikrs @avucic pic.twitter.com/5kqQfQ3wQz

— Maja Kocijančič (@MajaEUspox) March 23, 2018

Bashkimi Evropian insiston që Prishtina dhe Beogradi të normalizojnë raportet.

Me Strategjinë e re të zgjerimit, Komisioni Evropian vetëm sa u ka përsëritur si Kosovës ashtu edhe Serbisë, domosdoshmërinë e arritjes së një marrëveshjeje për normalizimin e raporteve, në mënyrë që të dyja shtetet të ecin drejt integrimit evropian.

Një ujdi e tillë është parashikuar të arrihet gjatë vitit 2019.